হাতী মাৰি ভুৰুকাত ভৰোৱাঃ হাতী এটা প্রকাণ্ড জন্তু আৰু ভুৰুকা হ’ল এধানমান পাত্র। প্রকাণ্ড হাতী এটা মাৰি ভুৰুকাৰ নিচিনা সৰু পাত্ৰ এটাত ভৰাব নোৱাৰি; ই এক অসম্ভৱ কাম। অসম্ভৱ কাম এটা যেতিয়া সম্ভৱ কৰাৰ নিচিনা হয় তেতিয়া এই যোজনা প্রয়োগ কৰা হয়।
শংকৰদেৱে ভাগৱতৰ নিচিনা প্রকাণ্ড গ্রন্থ এখনৰ সাৰমৰ্ম ‘গুণমালা’ নামৰ সৰু পদ-পুথি এখনত সামৰিছিল; শংকৰদেৱৰ ই আছিল হাতী মাৰী ভুৰুকাত ভৰোৱাৰ নিচিনা কাম; অসাধাৰণ প্ৰতিভা আৰু স্বকীয় দক্ষতাৰ পৰিচায়ক। এনেদৰে প্ৰতিভা আৰু দক্ষতাৰে অসম্ভৱ বা দুঃসাধ্য কাম সম্পন্ন কৰাৰ অৰ্থতে হাতী মাৰি ভুৰুকাত ভৰোৱা বুলি কোৱা হয়।
